اعلانات الفيس بوك VS جوجل ادوردز

اعلانات الفيس بوك VS جوجل ادوردز

===============================

لما بنتكلم عن الاعلانات فى عالم الديجيتال ماركتينج اول الأختيارات اللى بنفكر فيها هى اعلانات الفيس بوك و اعلانات جوجل ادوردز بأعتبار انهم اضخم و افضل برنامجين اعلانيين على مستوى العالم

عشان كده هنتكلم انهارده عن اهم الفروق بين البرنامجين و ازاى تختار البرنامج الأنسب لحملتك الاعلانيه

اهم الفروق بين البرنامجين :

=================

1 - احد اكبر الاختلافات الجوهرية بين البرنامجين , ان اعلانات الفيس بوك بتستهدف العملاء بناءا على الاهتمامات فى حين ان اعلانات جوجل ادوردز بتستهدف العملاء من خلال عمليات البحث عن كلمات مفتاحية محددة فى وقت احتياجهم

2 - امكانية الاستهداف القوى فى الفيس بوك بناءا على السمات الشخصيه للعملاء المحتملين
( السن - الجنس - الاهتمامات - النطاق الجغرافى - السلوك - الخ ) تعتبر نقطة قوى تتميز بها اعلانات الفيس بوك

3 - تكمن قوة اعلانات جوجل ادوردز فى استهداف العملاء لحظة اهتمامهم بالمنتج او الخدمه اللى بتقدمها و للسبب ده بيكون معدل تحويل الزوار الى عملاء فعلين احيانا اكبر من اعلانات الفيس فى حالة انك مستهدف الكلمه المفتاحية المناسبه

4 - احد مميزات اعلانات الفيس بوك اللى بتتميز بها عن اعلانات جوجل ادوردز هى انتشار الاعلان على نطاق واسع و ده بيرجع لأن الفيس بوك فى الاساس شبكة تواصل اجتماعى و بمجرد ما الاعلان بيبدأ عليه التفاعل من كومنت و شير و خلافه بيبدأ يظهر بشكل Organic لأصدقاء الفئه المستهدفه اللى تفاعلوا مع الاعلان و هكذا

5 - احد الاختلافات الجوهرية بين البرنامجين ان ال CPC ( تكلفة الضغطه ) بتكون اعلى فى جوجل ادرودز عن الفيس بوك و لكن زى ما ذكرنا فى النقط السابقه ان معدل التحويل بيكون اعلى بكتير فى حالة استهداف الكلمات المفتاحية المناسبة و عشان كده لازم دايما تحسب تكلفة الحملة و ال ROI فى كلا من البرنامجين عشان تقدر تحدد ايه الافضل بالنسبالك

6 - الفيس بوك بما انه شبكه تواصل اجتماعى و زى ما ذكرنا ان الاعلان بينتشر بصورة كبيرة بين الناس عليه , للسبب ده اعلانات الفيس بتكون افضل فى حالة ال B2C
اما اعلانات جوجل ادوردز بتكون افضل فى حالة ال B2B لأنه زى ما ذكرنا قبل كده انه بيستهدف العملاء من خلال عمليات البحث عن الكلمات المفتاحية فى لحظة اهتمامهم بنوعية المنتجات او الخدمات اللى بتقدمها

دى كانت اهم الفروق بين اعلانات الفيس بوك و اعلانات جوجل ادوردز و اللى بناءا عليها هتقدر تحدد البرنامج الانسب لحملتك الاعلانية 

المراحل الاساسية لبناء Brand على ال Social Media

المراحل الاساسية لبناء Brand على ال Social Media

==============================================

انهارده و بعد ما ظهرت قوة السوشيال ميديا و تأثيرها الكبير على اى بيزنس أو مشروع 

و ادراك اصحاب المشاريع مدى الفرص اللى هيفتقدوها فى حالة عدم استخدامهم للسوشيال ميديا كقناة تسويقية للمشروع من حيث زيادة المبيعات و بناء قاعدة عملاء محتملين فى المستقبل

عشان كده اصبح التوجه العام للشركات و المشاريع الناشئة بمختلف احجامها هو بناء براند للشركة او المشروع على السوشيال ميديا .. و عشان كده هنستعرض معاكم انهارده

المراحل الاساسية لبناء براند على السوشيال ميديا :
===============================
1 - دراسة الشريحة المستهدفه من العملاء و تحديد احتياجاتهم و اهتمامتهم و التحديات اللى بتقابلهم و اماكن تواجدهم و السن و النوع و كافة المعلومات اللازمه عنهم ..

2 - اختيار القنوات التسويقية المناسبه بناءا على الشريحه المستهدفه و اماكن تواجدهم 
و كمثال ( لو الشريحه المستهدفه كانت من دول الخليج .. اذا من الافضل استخدام تويتر و انستجرام كقنوات تسويقية بدالا من الفيس بوك لأن الشبكات المنتشرة فى دول الخليج تويتر و انستجرام و سناب شات اكثر من الفيس بوك )

3 - بعد اختيار القنوات التسويقية المناسبه اللى هنشتغل عليها بننتقل لمرحلة حصر المنافسين على القنوات دى و نبدأ عملية تحليل و دراسة المنافسين دول من كافة الجوانب كمثال ( المحتوى - اوقات النشر - معدل النشر - الخ )

4 - و بعد دراسة الشريحه المستهدفه و دراسة المنافسين و اختيار قنوات التسويق المناسبه 
بتيجى مرحلة وضع الخطة التسويقية للبراند لتحقيق اهداف محددة قابلة للقياس خلال فترة زمنية معينه

5 - البدأ فى تنفيذ اجزاء الخطة التسويقية المختلفة

6 - قراءة الاحصائيات و تحليل النتائج خلال فترة التنفيذ و مقارنتها بالأهداف الموضوعه 
و هل الخطة على الطريق الصحيح للوصول للأهداف المطلوب تحقيقها ولا لأ

7 - اجراء التعديلات اللازمه على الخطه التسويقية بناءا على المعلومات اللى تم استخلاصها من تحليل النتائج السابقه بما يتناسب مع الاهداف الموضوعه

دى كانت المراحل الاساسية لبناء وجود لأى براند على قنوات السوشيال ميديا المختلفه بأختصار و طبعا تحت كل مرحله من المراحل تفاصيل كثير جدا هنحاول ان شاء الله نتكلم فيها مع بعض الفترة اللى جايه

5 طرق لخسارة متابعيك على السوشيال ميديا

5 طرق لخسارة متابعيك على السوشيال ميديا 

معظم الشركات و الافراد اللى شغالة على السوشيال ميديا بغرض عرض البيزنس الخاص بها بيكون ليها غرضين اساسين :

اولا : تحقيق اقصى ربح ممكن من التواجد على السوشيال ميديا من خلال زيادة المبيعات

ثانيا : تكوين قاعده من المتابعين المهتمين بالمنتجات او الخدمات اللى بتقدمها الشركة و اللى بيتحول جزء منهم مع الوقت لعملاء فعلا و هما دول رأس مال الشركه فى المستقبل القريب

عشان كده من المهم جدا بناء علاقه جيده مع المتابعين دول .. و تجنب الاسباب اللى ينتج عنها خسارتهم و بالتالى خسارة عملاء محتملين فى المستقبل تم صرف مبالغ من المال للحصول عليهم

و من اهم الأسباب اللى بتؤدى لخسارة المتابعين على السوشيال ميديا :

----------------------------------------------------------------------

1 - ان محتوى صفحتك يكون عبارة عن اعلانات لمنتجاتك و خدماتك فقط بدون اضافة اى قيمة للمتابع ... عشان كده من المفضل ان تتبع نظرية ال ( 20/80 ) يعنى 20% من محتواك يكون اعلانى و 80% من المحتوى يكون محتوى بيقدم قيمه للمتابع زى المحتوى التعليمى مثلا

2 - ان كل تركيزك يكون مع منافسيك و تكون مهاجمتهم قضية حياتك و شغلك الشاغل على صفحتك بدلا من التركيز على شركتك او البراند بتاعك

3 - عدم الرد على المتابعين سواء كان على الكومنتات او الرسائل و تجاهل أراءهم

4 - عدم متابعتك لأحصائيات صفحتك بأستمرار و معرفة ايه نوع المحتوى اللى بيجذبهم و ايه الوقت المناسب لنشر بوستاتك

5 - التوقف عن النشر على صفحتك لمدة طويله .. لدرجة ان متابعيك ينسوا البراند بتاعتك

حاول دايما تتجنب الاسباب دى للحفاظ على متابعيك ... اللى هما فى الاساس راس مالك

اعلانات الفيس بوك - نصائح للحفاظ على حساب الفيس بوك الاعلانى

نصائح للحفاظ على حساب الفيس بوك الاعلانى 

===============================

حساب الفيس بوك الاعلانى حاليا بيعتبر كنز بالنسبه للكثير من الاشخاص و الشركات لأنه فعليا بيعتبر حجر الاساس للكثير من الشركات و المشاريع الناشئه لأعتمادهم شبه الكلي على اعلانات الفيس لتحقيق مبيعات و بناء قاعدة عملاء على السوشيال ميديا 

و لو تم تعطيل الحساب الاعلانى للمشاريع دى بتكون كارثه ... و المشكله ان الشخص اللى بيتم ايقاف حسابه لما بيحاول يفتح حساب جديد فى الغالب الفيس بيقدر يتتبعه و يقفل الاكونت الجديد 

و بما ان الوقاية خير من العلاج فمن الواجب على كل واحد او شركة بتستخدم الفيس بوك فى الاعلان بشكل اساسى ... انه يحافظ على الاكونت الاعلانى من ان يتم اغلاقه من الاساس 

و عشان كده احنا جمعنا بعض النصائح اللى بأتباعها هتساهم بشكل كبير فى الحفاظ على حسابك الاعلانى على الفيس من الاغلاق و بالتالى الحفاظ على استمرار المشروع :

النصيحه الاولى  ( الزاميه و فى غاية الأهمية ) :

================================

اقرأ شروط و سياسات الاعلان على الفيس بوك بعناية شديدة و التزم بها .. عشان الفيس مش بيهزر فى سياساته و معظم الاكونتات اللى بيتم حظرها فى الاساس بتكون بسبب مخالفة الشروط و السياسات دى و للأسف نادرا ان حد يقرأ و يفهم الشروط و السياسات و يلتزم بها  

عشان كده لو حسابك الاعلانى على الفيس مهم بالنسبه لعملك .. متترددش لحظه فى 

انك ( تذاكر بعناية ) الشروط و السياسات دى 

و تقدر تطلع على شروط و سياسات  الاعلان على الفيس بوك من هنا :

https://www.facebook.com/policies/ads/ 

النصيحه الثانيه ( حافظ على جودة حسابك الاعلانى ) :

===================================

كل حساب اعلانى على الفيس بوك ليه تقيم بمجموعه من النقاط تحدد جودته ..

 طبعا ما يقدرش يطلع على التقييم ده الا فريق دعم الفيس بوك بيحتاج يراجعها وعلى أساسها ينظر في شكواك في حالة إيقاف حسابك الإعلاني 

و من اهم الاسباب اللى بتقلل من جودة حسابك الاعلانى بالنسبه لفريق دعم الفيس بوك هو كثرة اعلاناتك المرفوضه من قبل الفيس بوك لمخالفتها شروط و سياسات الاعلان على الفيس بوك ( و ده بيوضح مدى اهمية النصيحه الاولى ) 

النصيحه الثالثة  ( توزيع العمل على اكثر من حساب اعلانى ) :

=========================================

الحسابات الاعلانية على الفيس بوك بتكون عبارة عن حاجه من اتنين ... 

اولا : الحساب الاعلانى الشخصى .. 

و ده الحساب اللى معظم الناس بتستخدمه و بيكون تبع الحساب الشخصى فى الفيس بوك

 ثانيا : الحسابات الاعلانية اللى تم انشائها عن طريق حساب ال Business Manager

و بالمناسبه ( حساب ال Business Manager ) ده حساب تم اتاحته من الفيس بوك للمعلنين بحيث انهم يقدروا يديروا شغلهم مع فريقهم على الفيس بوك من خلال اعطاء صلاحيات معينه لكل فرد فى الفريق على حسب وظيفته و على حسب ما يحتاج اليه

و من ضمن مميزات حساب ال Business Manager انك تقدر تفتح حتى 5 حسابات اعلانيه منفصله عن بعضها من خلاله 

و الحساب الاعلانى الشخصى هو الاكثر اهمية لأن من خلاله هتقدر تفتح حساب ال Business Manager اللى من خلاله هتقدر تفتح اكثر من حساب اعلانى عشان كده احنا محتاجين نحافظ على الاكونت الاعلانى الشخصى بقدر الامكان .. فا لو تم حظر الحساب الاعلانى الشخصى هيتم حظر حساب ال Business Manager بالكامل و الحسابات الاعلانية اللى تم انشائها من خلاله ... لكن ان تم حظر احد الحسابات الاعلانية اللى تم انشائها من خلال حساب ال Business Manager هتقدر تكمل شغل على باقى الحسابات الاعلانية من غير قلق ..

و عشان كده بننصح بأستخدام حساب ال Business Manager فى انشاء حسابات اعلانية منفصلة من خلاله و توزيع العمل عليها بدلا من الحساب الاعلانى الشخصى لتجنب حظر الحساب الاعلانى الشخصى فى حالة ارتكاب اى خطأ سهوا 

و تقدر تنشىء حساب ال Business Manager من هنا :

https://business.facebook.com/

الربح من اليوتيوب - 6 طرق لضمان نجاحك على اليوتيوب

بناءا على رغبة الكثير من المتابعين الافاضل 🙂

😉

هنتكلم النهارده على اهم النصائح اللى هتساعد على نجاحك على اليوتيوب و طبعا ده لأهميته فى عملية التسويق و بالتالى زيادة ارباحك .. خصوصا ان اليوتيوب هو تانى اكبر محرك بحث بعد جوجل

1 - اول 10 ثوانى فى الفيديو

--------------------------------
الثوانى الاولى من اى فيديو هى اهم ثوانى فى الفيديو على الاطلاق لأن بناءا عليها المشاهد بيقرر هل هيكمل الفيديو و لا لأ
عشان كده لازم تقدر تجذب انتباه المشاهد و تثير فضوله عشان يكمل الفيديو

2 - اختر Thumbnail جذابة 
---------------------------------
من اهم عوامل زيادة مشاهدات الفيديو هو اختيار صورة مصغرة جذابة للفيديو ... و لو لاحظت نفسك هتلاقى كام فيديو انت دخلت عليه قبل كده 
فقط بسبب الصورة الجذابه بتاعته .. حاول انك تختار لقطه من الفيديو تجذب الاتنباه و بأحد برامج التعديل على الصور اكتب عنوان الفيديو بأختصار و بشكل و الوان جذابه

3 - اهتم بالعنوان و الوصف
-------------------------------
زى ما قولنا قبل كده ان اليوتيوب هو تانى اكبر محرك بحث بعد جوجل.. و ده معناه انه بيخضع القوانين و مبادىء ال SEO

و من احد العوامل الاساسية فى ال SEO هو كتابة عنوان و وصف الفيديو بناءا على الكلمات المفتاحية الاساسية اللى بتستهدفها

و يجب مراعاة كتابة العنوان بصيغه جذابه و بها شىء من الفضول لجذب انتباه المشاهد تماما بنفس منطق الصورة المصغرة للفيديو

4 - ضع Call To Action فى نهاية الفيديو
----------------------------------------------
المشاهد اللى يتابع الفيديو لاخره ده مشاهد مميز و ده لأنه وجد افادة وقيمه فى الفيديو بتاعك و الا ما كنش كمل الفيديو للاخر
و هنا من المناسب جدا انك تستغل الوضع ده و تطلب منه شىء معين لأنه بنسبه كبيره هيوافق عليه زى مثلا انك تطلب منه انه يعمل اشتراك فى قناتك او انه يعمل شير للفيديو مع اصدقائه او يعمل لايك على صفحة الفيس او انه يسجل فى استمارة الموجوده فى وصف الفيديو و هكذا

5 - اربط فيديوهاتك ببعضها 
--------------------------------
ربط فيديوهاتك ببعضها البعض بيساعد على زيادة عدد مشاهدات قناتك و بيساعد اكتر على تحسين ال SEO الخاص بفيدوهاتك
و ده لأن كل ما زاد عدد مشاهدات قناتك و زادت معاها المده اللى بيقضيها المشاهد فى مشاهدة فيديوهاتك ... اليوتيوب بيفهم من كده ان محتوى الفيديوهات اللى بتقدمها مفيد و عشان كده هيفضل فيديوهاتك على فيديوهات منافسيك

6 - راجع احصائيات قناتك بأستمرار
--------------------------------------
شغل التسويق بشكل عام قائم على قراءة و تحليل الاحصائيات و اتخاذ قرارات بناءا عليها .. و ده عشان تقدر تعرف انت ماشى صح و بتحقق نتائج و لا لأ و لو فيه حاجه غلط تقدر تحدد هى ايه و تعدل فيها ... و التسويق عن طريق اليوتيوب بينطبق عليه نفس الكلام .. لازم تقرأ احصائيات قناتك و تعرف هل فيه تقدم بالنسبه لعدد المشاهدات و المشتركين و لا لأ و هل الفيديوهات بتحقق اهدافها التسويقية و لا لأ ... و ايه انواع المحتوى اللى بتهم المتابعين بتوعك على اليوتيوب و هكذا

الصورة بألف كلمه

زى ما بيقولوا ... الصورة بألف كلمه
======================

الصور انهارده بالنسبه للسوشيال ميديا عامله زى الميه بالنسبه للحياه .. حاجه اساسية لا يمكن الاستغناء عنها
استخدام صور جذابة و تصميمات ابداعية فى السوشيال ميديا بيساعد بصورة كبيره جدا فى انتشار العلامه التجارية لأى شركة و توصيل رسالتها بطريقة اكثر فاعلية

احنا كلنا عارفين ان .."المحتوى هو الملك".. و نقدر نعتبر برده ان .."الصور و التصميمات الجذابه هى الملكة"..
و لازم الصور و التصميمات دى تكون جذابه و احترافية عشان تجذب انتباه المتابعين .. و لكن المشكله ان مش كل اللى بيستخدم السوشيال ميديا مصمم أو مصور محترف

و عشان كده احنا انهارده هنشارك معاكم مجموعه من المصادر و الادوات المجانية اللى هتخليكم تقدروا تعملوا تصميمات احترافية للسوشيال ميديا بكل سهولة


أولا مصادر مجانية للصور :
==================
1 - pixabay.com

2 - http://thestocks.im/


ثانيا اداه مجانيه لعمل صور احترافية :
=======================
https://spark.adobe.com/

فكر بدماغ عميلك

دلوقتى لما بتيجى تكتب بوست جديد على الصفحه بتاعة البراند اللى شغال عليها لازم و انت بتكتب البوست تاخد بالك من مجموعه من المعايير 

و لأنك اصلا بتكتب البوست ده للعملاء بتوعك يبقى من المنطقى جدا انك تحط نفسك مكان العميل و تسأل نفسك مجموعه من الأسئله المهمه و اللى بأجابتها هتقدر توصل لأفضل قطعة محتوى ممكن تخرج منك للعميل 

لازم تسأل نفسك الأسئله دى و انت بتكتب اى بوست جديد :
-----------------------------------------------------------

1 - هل محتوى البوست ده مهم بالنسبه للعميل و بيقدمله قيمه ؟؟..

2 - لو كنت انا العميل .. هل طريقة عرض البوست هتجذبنى للقراءة ؟؟..

3 - هل التصميم اللى فى البوست ده هيجذب انتباهى من اول ما اشوفه ؟؟..

4 - هل طريقة كتابة البوست ده بتحفزنى انى اتفاعل معاها ؟؟..

و هكذا .. حاول دايما انك تفكر بدماغ المتابعين و العملاء و تعرف ايه اللى بيمثل قيمه بالنسبه لهم و وفر محتوى بناء على ده

5 مراحل لنجاحك على السوشيال ميديا

اى عمل فى الدنيا بيعتمد فى تنفيذه على مجموعه من الخطوات الاستراتيجية و كذلك التسويق على قنوات السوشيال ميديا ليه
مجموعه من الخطوات و المراحل اللى لو خدناها بعين الاعتبار هنضمن بشكل كبير النجاح على السوشيال ميديا

و فيه 5 مراحل اساية للنجاح على السوشيال ميديا :
----------------------------------------------------

1 - الدراسة 
---------------
و دى بتكون أول مرحلة فى الشغل و هى اننا ندرس السوق اللى شغالين عليه و ندرس الشريحه المستهدفه من و نحلل المنافسين و نحدد نقاط لقوة و الضعف فيهم
و نحدد بالضبط احنا هنقدر نتغلب عليهم ازاى و يكون لينا حصه من السوق ده


2 - التخطيط
---------------
و بعد ما بتخلص مرحلة الدراسة و بنطلع منها بمجموعه من المعلومات عن السوق و العملاء و احتياجاتهم و المنافسين .. الخ بندخل فى المرحلة الثانية و هى التخطيط
و فى المرحله دى بنبدأ نخطط لكل حاجه هنعملها بناءا على المعلومات اللى تم جمعها فى مرحلة الدراسة و بناءا على الاهداف المطلوب تحقيقها


3 - التنفيذ
-------------
بعد ما بنرسم الخطه بتاعتنا و بنحدد اهدافنا فيها بالضبط و بنحدد ازاى هنوصلها .. بنبدأ فى مرحلة التنفيذ العملى لأجزاء الخطة


4 - تقييم النتائج
------------------
و فى خلال ما احنا فى مرحلة التنفيذ .. بنبدأ نقيم النتائج اللى وصلنالها بأستمرار و هل هى مطابقة للنتائج المطلوب تحقيقها فى الخطه ولا لأ


5 - التعديل 
-------------
و بعد مرحلة تقييم النتائج بنبدأ نعدل فى مرحة التخطيط و التنفيذ و نقيم من جديد لحد اما نحقق اهداف الخطه بتاعتنا

اهم 4 خطوات للأستهداف الصحيح

خلينا نتفق على حاجه اساسية فى التسويق بشكل عام ... 
و هى انه لو كان عندك افضل منتج أو خدمه فى الدنيا بس ما قدرتش توصل بالمنتج أو الخدمه دى للشريحه المستهدفه من العملاء
يبقى انت كده حكمت على منتجك او خدمتك بالفشل من قبل ما تبدأ تسويق اصلا لأن المنتج أو الخدمه اللى بتقدمها لازم تكون بتخدم شريحه معينه من الناس
و عشان كده لازم تاخد بالك من الاستهداف او ال Targeting و انت بتعمل اى حمله اعلانية 

و انهارده هنتكلم عن اهم 4 نقط فى الاستهداف :
-----------------------------------------------

1 - المرحلة العمرية Age
----------------------------
لازم تسأل نفسك الأول .. ايه انسب فئه عمرية للمنتج او الخدمه بتاعتك ؟؟!!!
اجابة على السؤال ده هتفيدك فى حاجات كتير اهما اختيار اسلوب الاعلان المناسب للفئة دى من الناس .. لأن الأعلان لو موجه للشباب هيكون بأسلوب مختلف عن الاعلان الموجه لكبار السن و هكذا 

2 - الجنس Gender
------------------------
لازم نحدد جنس الشريحه المستهدفه هل رجال و لا سيدات .. و طبعا ده بيتم تحديده بناءا على نوعية المنتج أو الخدمه نفسها
يعنى مثلا لو بنتكلم عن اعلان لأحد اداوت الطبخ هنلاقى ان الشريحه الغالبه هى السيدات , و لو بنتكلم عن اعلان لماكينات الحلاقه يبقى اكيد الجمهور بتاعنا هو الرجال فقط 

3 - الموقع الجغرافى Location 
----------------------------------
لازم نحدد النطاق الجغرافى اللى بيتواجد فيه العملاء المستهدفين بشكل مستمر و اللى تقدر توفر منتجك اوخدمتك فيه 
يعنى لو افترضنا ان المشروع هو مركز كورسات و تدريب موجود فى القاهرة يبقى مش منطقى انك توجه اعلانك للمحافظات البعيدة عن القاهرة

4 - الأهتمامات Interests
----------------------------
و هنا بنحدد اهم الاهتمامات للفئة المستهدفه و المتعلقه بمجال المنتج او الخدمه
يعنى لو افترضنا ان المنتج هو احد اداوات المطبخ يبقى نختار الاهتمامات اللى ليها علاقه بالمطبخ عادة زى فن الطهى و وصفات الأكل و ما الى ذلك

و بمرعاة ال 4 نقط دى هنلاحظ تحسن كبير فى مردود الحملات الاعلانيه ... بعنى هنقدر تشوف عائد اكبر من نفس التكلفه اللى بتدفع عادة

ازاى تخلى عميلك هو اللى يجيلك

الوضع الغالب و المنتشر بالنسبه لمعظم البراندات و الشركات انها بتحاول تظهر بأعلانها للعميل و تطلعله فى كل حته .. حتى فى منامه لو امكن 
على اساس ان دى افضل طريقة لجلب العملاء و زيادة المبيعات !!.. و صحيح ان الطريقه دى بتحقق نتائج لكن مش دايما الطريقه دى بتكون الطريقه الأفضل لأن مش كل العملاء بينفع معاهم التسويق و البيع المباشر

من خلال العروض اللى الشركه أو البراند بينزل بيها .. دايما بيكون فيه قسم كبير من العملاء المحتملين اللى شافوا اعلانك بالفعل و مهتمين بمنتجك ( بفرض انهم مستهدفين صح ) ما بيخدش قرار الشراء من أول مره

و ده راجع لأنهم لسه مايعرفوش البراند بتاعك كويس و لسه ما فيش ثقه بينكم و عشان كده عدم قدرتك على جذب القسم ده من العملاء بيمثل خسارة للبراند بتاعك حتى و لو كانت الحمله الاعلانيه بتاعتك حمله ناجحه
و حققت مبيعات تغطى التكلفه و تحقق ربح كويس ..لأنك كان ممكن تكسب اكتر من نفس التكلفه لو انتبهت للقسم اللى ضاع منك من العملاء

السؤال بقى هنا

ازاى تخلى القسم ده من العملاء هو اللى يجيلك و يطلب منتجك أو خدمتك بنفسه ؟؟!!..
-------------------------------------------------------------------------

ببساطه عشان ده يحصل هتكون محتاج انك تبنى علاقه مع عميلك و تبدأ رحلة بناء الثقه بينكم و ده بيتم عن طريق ما يسمى

 بال Inbound Marketing

و هو بأختصار ان مش كل تواصل ليك مع العميل يكون عن منتجات و عروض شركتك او البراند بتاعك بس ... لازم يكون فيه قيمه مقدمه للعميل بدون اى مقابل 

عشان العميل ما يحسش ان انت كل همك انك تبيعله و خلاص

و القيمه دى ممكن تكون معلومات مفيده مثلا فى مجال الشركه .. ممكن تكون مقاله فيها حل لمشكله بيواجهها فى المجال ده ...الخ
الفكرة هى تقديم شىء يمثل قيمه بالنسبه للعميل ده .. و من هنا هتبدأ ثقة العميل فى البراند تزيد و أول ما يفكر يشترى المنتج اللى البراند بتاعك بيقدمه هيكون ليك انت الأولوية عن المنافسين