يعنى ايه Buyer Persona

يعنى ايه Buyer Persona
====================

بص يا سيدى .. دلوقتى لو انت بتقرأ البوست ده و متابعنا يبقى انت فى الغالب حاجه من 3
يا أما انت صاحب بيزنس أو انك لسه عاوز تفتح بيزنس أو انك تكون مسوق و بتشتغل على البيزنس بتاع عملائك

المهم ان انت بتتعامل مع بيزنس بيقدم منتج أو خدمه لشريحه معينه من الناس .. تمام

خدت بالك من الجمله دى .. (شريحه معينه من الناس)

لو انت مش عارف الشريحه دى كويس .. هتبقى عامل زى اللى بيدور على عيل تايه بس ميعرفوش

يعنى ازاى هتوصل اصلا لعميل انت مش عارفه من الاساس

و هو ده بالظبط اللى بتساعدنا فيه ال Buyer Persona


ايه بقى هى ال Buyer Persona دى :
--------------------------------------------
هى عبارة عن وصف دقيق لشخصية العميل المستهدف المثالى للمنتج او الخدمه اللى البيزنس بتاعك بيقدمها
و بتقدر تحدد مواصفات شخصية العميل ده بناءا على عملية بحث السوق و مجموعه بيانات حقيقية عن عميلك


و من اهم الصفات اللى لازم
تبقى عارفها عن عميلك و انت بتعمل ال Buyer Persona :
-----------------------------------------------------------------------

1 - النوع : هل الخدمه او المنتج بتاعك موجه للرجال و لا للنساء و لا الاتنين مع بعض

2 - السن : ايه هى اهم الفئات العمرية للشريحه بتاعتك

3 - اماكن التواجد : اهم الاماكن اللى بيكون متواجد فيها بصفه دورية

4 - الأهتمامات : لازم تعرف ايه بالضبط اهتماماته

5 - المشاكل : اهم المشاكل اللى بتواجه و تقدر تحلهاله بمنتجك أو خدمتك اللى بتقدمها

6 - السلوك : لازم برده تعرف اهم الانماط السلوكيه للعميل

7 - الدوافع : ايه اهم دوافعه و ازاى تستخدمها

و طبعا دى كانت مجموعه من الصفات الشخصيه للعميل اللى لو انت قدرت انك تعرفها بالتحديد هتقدر توصل للعميل بتاعك و هتقدر انك تتواصل معاه بشكل افضل
و طبعا ده هينعكس على المبيعات و صورة البراند فى ذهن العميل بشكل ايجابى

و طبعا كل ما تجمع عن العميل بتاعك معلومات اكتر هتقدر تحدده و تتواصل معاه بشكل افضل

و تابعونا الفترة الجايه بأذن الله هنتكلم عن اهم الادوات و الأستراتيجيات اللى تقدر تستخدمها عشان تجمع معلومات عن العملاء المناسبين للبيزنس اللى انت شغال عليه